२०११ च्या भारतीय जनगणनेनुसार कोलवली–देदाळे गावात सुमारे ६०० च्या आसपास कुटुंबे राहतात. एकूण लोकसंख्या अंदाजे ३००० च्या पुढे असून त्यामध्ये पुरुष व महिलांचे प्रमाण जवळपास समान आहे. गावामध्ये प्रामुख्याने आदिवासी (वारली) व कुणबी समाजातील नागरिक वास्तव्य करतात. कुणबी समाजाचा मुख्य व्यवसाय शेती असून भात, नागली, भाजीपाला व फळबागा ही पिके घेतली जातात. आदिवासी समाजातील अनेक जण शेतमजुरी, वीटभट्टी कामगार, बांधकाम कामगार तसेच हंगामी मजुरी करतात. काही कुटुंबे कुक्कुटपालन, बकरीपालन व लहान प्रमाणात दुग्धव्यवसायही करतात.

गावात गणेशोत्सव, होळी, दिवाळी तसेच आदिवासी पारंपरिक सण मोठ्या उत्साहात साजरे केले जातात. ग्रामपंचायतीमार्फत पाणीपुरवठा, रस्ते, स्वच्छता, शासकीय योजना राबविणे इत्यादी कामे केली जातात. नैसर्गिक संपन्नता, शेतीप्रधान जीवनशैली व पारंपरिक संस्कृती यांमुळे कोलवली–देदाळे हे गाव सामाजिक व सांस्कृतिक दृष्ट्या समृद्ध मानले जाते.